業主炒乜嘢我唔知，只知道我要搬屋

最近有位同事成日愁眉苦臉，問佢發生咩事，原來就快要被業主「請走」。但理由唔係加租，也唔係業主要回收層樓自住，而係一個意想不到的理由，就係業主炒「幣」炒爆咗，以為呢D狗血劇情韓國先會發生，點知香港都有。

據聞個業主大約三十幾四十歲，層樓市值大約千萬左右，仲供緊既。佢之前見Bitcoin不斷破頂，去到12.6萬美元歷史高位都仲追住買。點知十月個陣啱啱創完新高冇幾日，十月十一號晚特朗普就突然放風要徵中國100%關稅，幣價一度插到10.5萬，市值爆倉二百億美金，業主都係其中一個，佢開咗槓桿，結果一鋪輸咗接近二百萬港元，最頂癮系過兩日，特朗普又放軟口風。

之後見比特幣反彈返去11.5萬，以為「又嚟嗰套」，再加番D倉搏多次。可惜美國國會長期停擺破紀錄，停擺完竟然有繼續跌，仲要跌得仲快，Bitcoin十一月中突然再跌穿9.5萬，佢又再輸二百萬。結果本金冇晒，仲拖欠卡數、財仔數百幾萬。

本身供樓都已經手緊，依家每個月要還卡數貸款，入唔敷出，無錢供樓，唯有賣樓填番條數。之前買幣個三百幾萬都係辛苦工作同投資十幾年慢慢儲番來，結果一個月就清袋。

層樓有租客喺度好難賣，冇辦法，只能夠踢走我同事，提早收番層樓，就算要補錢畀我同事，都要盡快清空單位交吉。租客慘，業主更慘。